విచక్షణాధికారం దుర్వినియోగం చేసి మరీ తెలంగాణా ఇవ్వాలా ?

రాజకీయ పార్టీలు అంగీకరించాయన్న నెపంతో ఆంధ్ర ప్రదేశ్ విభజనకి కేంద్రం పూనుకోవటం మూర్ఖత్వం.  అసలు స్వంత పార్టీలోనే విభజన పట్ల ఏకాభిప్రాయం లేని కాంగ్రెస్ పార్టీ ఇతర పార్టీల లేఖలని నమ్మి విభజన ప్రతిపాదన పై దూకుడుగా ముందుకు వెళ్ళటం ఖచ్చితంగా కేంద్రానికి వున్న విచక్షణాధికారాలని దుర్వినియోగం చెయ్యటమే!  రాష్ట్ర  శాసన సభ అంగీకారంతో సంబంధం లేకుండా ఆర్టికిల్ 3 కింద తనకు వున్న విచక్షణాధికారంతో రాష్ట్రాన్ని ముక్కలు చేస్తే అది భవిష్యత్తులో ఎన్నో దుష్పరిణామాలకి దారి తీస్తుంది.   దీన్ని ఆదర్శంగా తీసుకొని భవిష్యత్తులో కేంద్రం లో  రాబోయే ప్రభుత్వాలు తమకు నచ్చని రాష్ట్రాలని ముక్కలు చేసి బలహీనం చేసేస్తే అడిగే వాళ్ళెవ్వరు? కొత్త రాష్ట్రాల ఏర్పాటు, రాష్ట్రాలలో రాష్ట్రపతి పాలన విధింపు, ఇంకా గవర్నర్లకి వుండే విచక్షణాదికారాలని వివేచనతో ఉపయోగించాలి కాని పిచ్చోడి చేతిలో రాయిలాగ వాడకూడదు. రాష్ట్రంలో గత 45 రోజులుగా జరుగుతున్న సమైఖ్యాంధ్ర ఉద్యమం దెబ్బకి దాదాపు అన్ని రాజకీయ పార్టీలు పునరాలోచనలో పడ్డాయి. లేఖలు ఇచ్చిన కొన్ని పార్టీలు యూ టర్న్ కూడా తీసుకున్నాయి.  అయినా రాజకీయ పార్టీల

నిర్ణయాలు రోజుకో విధంగా మారిపోతుంటాయి.  ఈ రోజు విభజనకి అనుకూలంగా లేఖలు ఇచ్చిన పార్టీలు రేపు వాటిని వెనక్కి తీసుకుంటే జరిగి పోయిన విభజన ని కేంద్రం వెనక్కి తేగలదా?    ప్రస్తుతానికి  ఉత్తర ప్రదేశ్ రాష్ట్ర శాసన సభ తమ రాష్ట్రాన్ని 4 ముక్కలు చేయాలని తీర్మానం  చేసి  కేంద్రానికి పంపించింది.   అంటే విభజనకి ఒక దశ ముందులో  ఉన్న ఆ ప్రతిపాదన పక్కన పెట్టి  --  విభజనకి ప్రతిపాదనకే వ్యతిరేకంగా మహోగ్రంగా ఉద్యమిస్తున్న ప్రజల అభీష్టానికి వ్యతిరేకంగా తెలుగు రాష్ట్రాన్ని ముక్కలు చేయాలని కేంద్రం ముందుకి వెళ్ళటంలో ఔచిత్యం ఏమిటి?  రాజకీయ  సమీకరణాలే  పరమావధిగా మొండి గా ముందుకి సాగుతున్న కేంద్రం ప్రజాభిప్రాయమే ఫైనల్ మానిఫెస్టో అని ఎప్పుడు తెలుసుకుంటుంది?