కేవలం తిరుమల దేవస్థానం బోర్డు చైర్మన్ పదవి కోసమే పార్టీ ఫిరాయించి ఆ పదవిని పొందిన ఆదికేశవులు నాయుడు దేవస్థానం విషయంలో చేస్తున్న ఆకృత్యాలకు అంతే లేకుండా పోతోంది. ఎంతో ఆర్భాటంగా ప్రకటించిన అనంత స్వర్ణ మయం పధకానికి హై కోర్టు అడ్డు చెప్పినా కూడా ఇంకా ఆ పధకం పట్ల ఆయన ప్రత్యెక శ్రద్ధ చూపడం పట్ల ఎవరికైనా అనుమానాలు రాక తప్పదు. తాజాగా నిన్న - సామాన్య భక్తులందరికీ కొండ ప్రవేశం నిషిద్ధమైన వేళలో - తానె దగ్గరుండి అంబానీ కుటుంబాన్ని కొండ పైకెక్కించి, ఆలయ ప్రవేశం చేయించి సకల మర్యాదలు చేయడంలో అర్ధం, పరమార్ధం ఏమిటి? పైగా కోర్టు కేసు క్లియర్ అయితే ఈ పధకానికి బంగారం విరాళంగా ప్రకటిస్తామని అంబానీలు ప్రకటించటం నిజంగా సిగ్గు చేటు. తన ఆలయాన్ని స్వర్ణ మయం చేయమని ఆ దేవుడేమీ కోరలేదు. ఈ అంబానీలు ఇచ్చే బంగారానికి ఏమీ ఆయన మొహం వాచి లేడు. కార్య నిర్వహణ అధికారిగా కృష్ణారావు గారు వచ్చిన దగ్గరనించి, ఆయన చేస్తున్న సంస్కరణలకు అడుగడుగునా అడ్డు తగులుతూ, స్వంత ప్రయోజనాల కోసం ఆలయ మర్యాదలని మంట గలుపుతున్న ఆది కేశవుని కబంధ హస్తాలనుంచి టీ.టీ.డీ. ఎప్పుడు విముక్తమవుతుందో?
