సర్వ అనర్ధాలకు కారణభూతమయ్యే విభజన మనకొద్దు !

శ్రీ కృష్ణ కమిటీ ఇచ్చిన రహస్య నోట్ గురించి వార్తా పత్రికల్లో వచ్చిన కధనాలు గమనిస్తే రాష్ట్ర విభజన అన్నది ఎంత అనర్ధ దాయకమో తేట తెల్లమై పోతుంది.  తెలంగాణా అన్నది విఫల రాష్ట్రంగా మిగిలి పోతుందని విష్పష్టంగా కమిటీ ప్రకటించింది.  అంతే కాదు.. ప్రస్తుతానికి అదుపులో ఉన్న నక్సల్ సమస్య - అలాగే మనం మరచి పోయిన మత  కలహాలు వంటి విపత్తులు కూడా సంభవించే అవకాశం  వుందని తేల్చింది.  దేశానికే ప్రమాదకరమైన జిహాదీ తీవ్ర వాదం కూడా పెచ్చరిల్లే అవకాశం వుందని తేల్చి చెప్పింది.  ఇది 2010 నాడు శ్రీ కృష్ణ కమిటీ ఇచ్చిన వివరణ !  ఇప్పుడు తాజాగా ఐబీ అధిపతి ఇబ్రహీం కూడా ప్రత్యెక రాష్ట్రం ఇస్తే అది కేవలం ఆంధ్ర ప్రదేశ్ లోనే గాక దేశ  వ్యాప్తంగా భద్రతా సంస్థలకి కొత్త సవాళ్లు ఎదురౌతాయని కేంద్ర హొమ్ మంత్రితో అధికారిక సమావేశం లో ప్రకటించారు. ఇంక ఈ మధ్యనే కేంద్ర హొమ్ శాఖ తరపున రాష్ట్రానికి వచ్చిన టాస్క్ ఫోర్స్ కమిటీ ఏ నివేదిక సమర్పించిందో బహిర్గత పరచక పోయినా దాదాపు ఇటువంటి పరిణామాలనే సూచించినట్లు వార్తా కధనాలు తెలియజెప్తున్నాయి.     స్వయంగా ప్రభుత్వమే నియమించిన శ్రీ కృష్ణ  కమిటీ - అలాగే సాక్షాత్తు ప్రభుత్వ సంస్థ అయిన ఐబీ వంటి సంస్థలు  విభజన వలన  ఏర్పడే దుష్పరిణామాలని  ఏకరువు పెట్టినా కూడా కేంద్ర ప్రభుత్వం కేవలం రాజకీయ సమీకరణాలని దృష్టిలో ఉంచుకొని ఆంధ్ర ప్రదేశ్ రాష్ట్ర విభజన కోసం మొండి గా ముందుకి సాగటం మూర్ఖత్వం. ఓ పక్క ఉత్తర ప్రదేశ్ శాసన సభ తన రాష్ట్రాన్ని 4 ముక్కలుగా విభజించమని కేంద్రానికి తీర్మానం పంపినా దాన్ని పక్కన పెట్టి - మన  రాష్ట్రంలో  70 శాతం మంది ప్రజలు విభజనకి వ్యతిరేకం అయినా కూడా, మన  రాష్ట్ర శాసన సభ అంగీకారంతో ప్రమేయం లేదు అన్న రీతిగా నిరంకుశంగా సాగుతున్న విభజన ప్రక్రియ  రాజ్యాంగం లోని ఆర్టికిల్ 3 దుర్వినియోగం చెయ్యటమే అవుతుంది.  అంతే గాక విభజన వల్ల రాష్ట్రం లోపల - బయట కూడా భద్రతా పరమైన సవాళ్లు ఎదురు అవుతాయని సమాచారమున్నా కూడా కేంద్రం వెనుకడుగు వేయక పోవటం దేశ సమగ్రత పట్ల కాంగ్రెస్ పార్టీ చిత్త శుద్ది నే శంకించే పరిస్థితి తెస్తోంది.  కేవలం తన రాజకీయ ప్రయోజనాల కోసం రాష్ట్ర / దేశ సమగ్రతలని పణం గా పెట్టి కాంగ్రెస్ తీసుకు రానున్న విభజన బిల్లు ని ప్రతిపక్షాలన్నీ తిప్పి కొట్టాలి.  అలాగే రాష్ట్రపతి కూడా తన వివేచన ఉపయోగించి సర్వారిష్ట కారకమైన విభజన బిల్లు అనుమతించకుండా  విజ్ఞత చూపించాలి.   కాని పక్షంలో మన రాష్ట్రాన్ని, దేశాన్ని ఆ భగవంతుడే కాపాడాలి....