తెలంగాణా ఇవ్వడానికి కాంగ్రేసుకి ఉన్న హక్కు ఏమిటి?

"తెలంగాణా కి ఒకే అంటే సోనియా కాళ్ళు కడిగి ఆ నీళ్ళు నెత్తిన జల్లుకుంటా..- 26 డిసెంబర్,2010  న కే.సి.ఆర్."

ఛీ.. ఇదేనా తెలుగు వాడి ఆత్మ గౌరవం?

స్వంత కొంపలోని అవి నీతిని, అసమ్మతి సెగల్నిఅదుపు చేసుకోలేని ఇటలీ దేవతకి ఇంతలా సాగిల బడి పోవాలా? 33 మంది ఎం.పీ లని ఆంధ్ర ప్రదేశ్ అందించినా కూడా మంత్రి వర్గ విస్తరణలో మన రాష్ట్రానికి ఇచ్చిన ప్రాధాన్యం చూస్తె కాంగ్రేసు దృష్టిలో మన రాష్ట్రానికి ఎంత విలువున్నదో ఇట్టే అర్ధమవుతోంది. ఆంధ్ర ప్రదేశ్ రాష్ట్రానికి ఏ మాత్రం విలువనివ్వని కాంగ్రెస్ పార్టీకి రాష్ట్ర విభజన పైన ఎలాంటి నిర్ణయం తీసుకొనే హక్కు  లేదు.అయినా చిన్నా చితకా పార్టీల మద్దతుతో తప్ప కేంద్రంలో స్వంత బలం తో ప్రభుత్వం ఏర్పాటు చేయలేని కాంగ్రేసు పార్టీ ఒక రాష్ట్ర విభజన వంటి కీలక అంశాన్ని ఏక పక్షంగా  ఎలా నిర్ణయిస్తుంది? ఇతర భాగస్వామ్య పక్షాలతో  సంప్రదించకుండా ఏక పక్షంగా 9 డిసెంబరు 2009 నాడు చేసిన ప్రకటనకి విలువ ఉంటుందా? ఆనాడు అక్కర్లేని అఖిల పక్షం అభిప్రాయం ఇప్పుడు మాత్రం ఎందుకు? సరే, 9 డిసెంబర్2009  ప్రకటన కీలకమైనదే అనుకుందాం. మరి అదే కేంద్ర హోం మంత్రి అదే హోదాలో చేసిన 23 డిసెంబర్  2009 నాటి ప్రకటన కి కూడా అంతే   ప్రాధాన్యం వుంటుంది. ఇంకా  ఎక్కువే ప్రాధాన్యత వుంటుంది. ఎందుకంటే జరిగిన పొరపాటుని సరి దిద్దే ప్రకటన అది! ప్రకటన దిద్దుకోవడంతో సరి పోదు. తదనంతర పరిణామాల్లో ఏర్పాటు చేసిన శ్రీ కృష్ణ కమిటీ కూలంకషంగా స్టడీ చేసి ఇచ్చిన అత్యుత్తమ ఆరవ సిఫార్సుని వెంటనే అమలు చేయాలి.అలా చేయకుండా నాన్చినంత కాలం ఆంధ్ర ప్రదేశ్ అభివృద్ది సంవత్సరాల వెనక్కి వెళ్లి పోవటం ఖాయం.